Félag íslenskra bifreiðaeigenda gagnrýnir gjaldtöku Reykjavíkurborgar og einkafyrirtækja á bílastæðum.

Samtökin fullyrða í tilkynningu að óreiða ríki í innheimtuleiðum og víða skorti verðupplýsingar. 

„Reykjavíkurborg og einkafyrirtæki hafa að undanförnu stóraukið gjaldtöku fyrir bílastæði, stækkað gjaldtökusvæði, lengt gjaldtökutíma og sett upp ný,“ segir í tilkynningunni.

„Gjaldtaka á sumum nýlegum bílastæðum í einkaeigu lyktar af græðgi. Nefna má bílastæðið á Barónsstíg 4, þar sem klukkutíminn kostar 1.000 krónur og innheimt er allan sólarhringinn.“

Frétt af mbl.is

Fyrirtæki verja bílastæðin sín

Við Röntgen Domus kostar fyrsta klukkustundin nú 320 kr. og hver klukkustund eftir það 800 kr. Gjaldskylda er allan sólarhringinn. mbl.is/Eggert Jóhannesson

Meiri ásókn í gjaldfrjáls bílastæði

Þá segir að alvarlegur fylgifiskur útþenslu gjaldtökusvæða sé að fólk sækist meira í gjaldfrjáls bílastæði. Fullyrt er að íbúar miðsvæðis í Reykjavík séu að missa stæði við heimili sín vegna þessa.

Einnig sé óljóst hvaða greiðsluleiðir standi til boða á hvaða svæði. Fjöldi bílastæðafyrirtækja og greiðsluleiða valdi því að bíleigendur fái oftar en ekki kröfu um greiðslu „vanrækslugjalda“ upp á margfaldar fjárhæðir sjálfra bílastæðagjaldanna. 

Þá undra samtökin sig á því að Neytendastofa hafi ekki tekið í taumana. Aðhalds- og aðgerðaleysi hins opinbera gagnvart þessari þróun valdi vonbrigðum.

Bæta þurfi almenningssamgöngur samhliða

Fullyrt er að svokölluð ringulreið innheimtuaðferða, græðgisvæðing á bílastæðum og lenging gjaldtökutíma, lendi af fullum þunga á herðum almennings.

„Óviðunandi er að fólk sitji uppi með alls konar refsigjöld vegna þessa ástands. Sérkennilegt er að horfa upp á þéttingu búabyggðar í miðborg Reykjavíkur á sama tíma og bílastæðum er fækkað, stæðisgjöld hækkuð og gjaldtökusvæðum fjölgað, án þess að því fylgi aukin og bætt þjónusta með almenningssamgöngum.“

Tengdar fréttir

Borgarlínan

Bæta þarf samgöngur til að breyta ferðavenjum

• Stóraukið fé til samgöngusáttmála
• 100 km jarðgöng leysa ekki vandann
• Byggt við flugvöllinn enn á ný
• Segir holan hljóm í gagnrýni á Fossvogsbrú

» Fleiri tengdar fréttir

• Blogga um frétt