Saporisjía án sambands við rafveitukerfi
Setja bókamerki
Úkraínska kjarnorkuverið Saporisjía, sem Rússar ráða nú yfir, hefur misst samband við rafveitukerfi sitt á nýjan leik.
„Eftir að háspennulína slitnaði missti kjarnorkuverið samband við rafveitukerfið sitt,” skrifuðu Rússarnir sem sjá um kjarnorkuverið á Telegram. Bættu þeir við að verið sé að rannsaka orsakirnar og að díselknúnar vararafstöðvar haldi kjarnorkuverinu gangandi.
Úkraínska kjarnorkumálastofnunin Energoatom sakaði Rússa um að hafa gert loftárás í morgun sem olli rafmagnsleysinu og bætti við að þetta væri í sjöunda sinn sem kjarnorkuverið lenti í myrkvun sem þessari síðan rússneskar hersveitir réðust inn í Úkraínu í mars í fyrra.
Energoatom sagði jafnframt að rafalar kjarnorkuversins hefðu yfir að ráða tíu daga eldsneytisbirgðum.
„Ef það tekst ekki að koma aftur á sambandi við rafveitukerfið á þessum tíma gæti slys tengt geislun haft í för með sér afleiðingar fyrir allan heiminn,” sagði stofnunin.
Héraðsstjórinn í Dnipro sagði að loftárás hefði verið gerð í nótt með fjórum rússneskum flugskeytum og 15 drónum sem hefði orðið að minnsta kosti átta almennum borgurum að bana.
Rafael Grossi, yfirmaður kjarnorkumála hjá Sameinuðu þjóðunum, hefur reynt að semja bæði við Rússa og Úkraínumenn um aukið öryggi kjarnorkuversins. Hann sagði að þetta væri í sjöunda sinn sem rafmagnið færi af síðan stríðið hófst.
„Ástandið hvað varðar kjarnorkuöryggi í kjarnorkuverinu er mjög viðkvæmt,” sagði hann á Twitter. „Við verðum að vera sammála um að vernda kjarnorkuverið þegar í stað. Þetta ástand má ekki halda áfram,” sagði Grossi, sem heimsótti kjarnorkuverið í mars síðastliðnum.
Saporisjía framleiddi um 20 prósent af rafmagni Úkraínumanna á sínum tíma og hélt það áfram að starfa fyrst eftir að Rússar réðust inn í landið þrátt fyrir skotárásir þeirra. Orkuframleiðsla kjarnorkuversins hætti í september.
Enginn af sex kjarnaofnum þess hefur framleitt rafmagn síðan þá. Kjarnorkuverið er þó áfram tengt úkraínska rafveitukerfinu til að hægt sé að kæla niður kjarnaofnana.
Halla: Líkti Ólafi Ragnari ekki við Robert Mugabe
Kærir teiknara Vísis til siðanefndar
Veita fyrirtækjum brú yfir óvissutímabil
„Þær áttu bara að læra sína lexíu“
Braut gegn konum í Eyjum
Mennirnir í haldi lögreglunnar á Suðurnesjum