Hæðin heldur lægðinni fjarri

Nú er 1.038 mb hæð milli Íslands og Færeyja sem stjórnar veðrinu hjá okkur. Víðáttumikil og djúp lægð er nærri Nýfundnalandi, en hún kemur ekki við sögu í veðrinu á Íslandi því hæðin heldur henni fjarri. Veður verður því með rólegra móti út vikuna að því er segir í hugleiðingum veðurfræðings á Veðurstofu Íslands. 

Spáin í dag er annars svohljóðandi: Sunnangola eða -kaldi og dálítil væta norðvestan- og vestanlands, en bjartviðri um landið austanvert. Hiti víða 2 til 7 stig yfir daginn.

Suðaustanátt á morgun, áfram gola eða kaldi að styrk. Lítils háttar rigning af og til, en þurrt og bjart á Norður- og Austurlandi. Svipaður hiti áfram.

Veðurhorfur á landinu næstu daga

Á föstudag:
Sunnan 3-8 m/s, skýjað og sums staðar dálítil rigning, en þurrt og bjart norðaustan- og austanlands. Hiti 1 til 6 stig.

Á laugardag:
Austlæg eða breytileg átt 3-8, en 8-13 með norðurströndinni. Skýjað og dálítil væta á köflum, hiti 1 til 6 stig. Stöku él norðaustan til á landinu og vægt frost þar.

Á sunnudag:
Sunnan 3-8 og dálítil væta á Suður- og Vesturlandi, en þurrt annars staðar. Hiti 1 til 6 stig.

Á mánudag:
Breytileg átt 5-13 og rigning eða slydda með köflum í flestum landshlutum. Hiti 0 til 5 stig.

Á þriðjudag:
Ákveðin norðaustanátt með snjókomu á norðanverðu landinu, en hægari vindur og úrkomulítið sunnan til. Frystir um mestallt land.

Á miðvikudag:
Útlit fyrir hvassa norðanátt með snjókomu, en úrkomulaust að mestu sunnanlands. Frost víða 0 til 5 stig.