Körfuknattleikssamband Evrópu, FIBA Europe, tilkynnti í dag að það myndi fara að fordæmi Alþjóða körfuknattleikssambandsins og vísa Rússum úr lokakeppni Evrópumóts karla sem fer fram síðar á þessu ári.
Þá eru bæði Rússar og Hvít-Rússar útilokaðir frá þátttöku í Evrópumótum í hinum ýmsu aldursflokkum, sem og Evrópumótum félagsliða á keppnistímabilinu 2022-23, vegna innrásar Rússa í Úkraínu.
Rússar áttu að vera í A-riðli EM sem leikinn verður í Tbilisi í Georgíu í september en það verður Svartfjallaland sem kemur inn í lokakeppnina og í þann riðil í þeirra stað.
Evrópumótið er haldið í fjórum löndum, Tékklandi, Georgíu, Ítalíu og Þýskalandi, og hefst 1. september.