Útlit fyrir að vínbúðin fari úr miðbænum og út á Granda

Útlit er fyrir að vínbúð ÁTVR í miðbæ Reykjavíkur verði flutt úr Austurstræti og út á Granda. Sigrún Ósk Sigurðardóttir, aðstoðarforstjóri ÁTVR, sagði í svari við fyrirspurn Morgunblaðsins í gær að húsnæðið á Fiskislóð 10, þar sem Íslandsbanki var áður til húsa, hafi uppfyllt skilyrði um staðsetningu og þær kröfur sem gerðar voru í auglýsingu ÁTVR á dögunum.

Frétt af mbl.is

Vínbúðinni í Austurstræti lokað?

„Næsta skref er að fara í viðræður við eigendur húsnæðisins á Fiskislóð 10 og sjá hvort samningar nást. Það verður ekki fyrr en niðurstaða liggur fyrir úr þeim viðræðum að ákvörðun verður tekin um opnun nýrrar vínbúðar og þá hugsanlega lokun á vínbúðinni í Austurstræti,“ segir Sigrún.