Sviptingar í kvöld

Tíunda og næstsíðasta umferð Íslandsmótsins í skák fór fram í kvöld. Hannes Hlífar Stefánsson er efstur eftir umferð dagsins líkt og í gær en annað sætir vermir nú Vignir Vatnar Stefánsson í stað Guðmundar Kjartanssonar. Vignir þótti ólíklegur til þess að ná öðru sæti eftir gærdaginn. 

Frétt af mbl.is

Hannes með forystuna eftir tíu umferðir

Hannes tapaði viðureign sinni við Jóhann Hjartarson sem er nú í fimmta sæti. Hannes hafði unnið átta skákir í röð fyrir umferð dagsins. Þá tapaði Guðmundur Kjartansson gegn Jóhanni Ingvarssyni. Vignir Vatnar Stefánsson sigraði svo að lokum Braga Þorfinnsson. Þetta kemur fram í tilkynningu Skáksambandsins. 

Vignir og Hannes mætast því á morgun en sigurvegari viðureignarinnar verður Íslandsmeistari í skák árið 2023. Komi upp jafntefli verður aukakeppni um titilinn. Möguleiki er á þriggja manna aukakeppni hafi Guðmundur betur gegn Braga þar sem Guðmundur er aðeins hálfum vinning á eftir Hannesi og Vatnari.

Staðan fyrir morgundaginn er eftirfarandi:

1.-2. Hannes Hlífar Stefánsson og Vignir Vatnar Stefánsson 8 v.

3. Guðmundur Kjartansson 7½.

4. Hilmir Freyr Heimisson 7 v.

5. Jóhann Hjartarson 5½ v.

6.-7. Aleksandr Domalchuk-Jonasson og Hjörvar Steinn Grétarsson 5 v.

8. HenrikDanielsen 3½ v.

9.-10 Lenka Ptácníková og Dagur Ragnarsson 3 v.

11. Bragi Þorfinnsson 2½ v.

12. Jóhann Ingvason 2.

Teflt er á Ásvöllum í Hafnarfirði og hefst lokaumferðin klukkan 13.00 á morgun. 

Frekari upplýsingar um mótið má sjá á skak.is.

• Blogga um frétt