Starfsfólk ÁTVR þáði engar gjafir nema að „óverulegu verðmæti,“ frá birgjum Vínbúðanna yfir nýafstaðna hátíðarvertíð vínbúðanna. „Óverulegt verðmæti,“ er í skilningi Vínbúðanna allt undir 3.500 kr.

Þetta kemur fram í svari Sigrúnar Óskar Sigurðardóttur, aðstoðarforstjóra ÁTVR við fyrirspurn DV til Ívars J. Arndal, forstjóra ÁTVR.

Kemur jafnframt fram í svarinu að samkvæmt reglum ÁTVR ber starfsfólki ríkisfyrirtækisins að tilkynna mannauðssviði um allar gjafir. Í reglunum frá júní 2019 segir:

Starfsfólki er óheimilt að þiggja gjafir eða aðra umbun frá birgjum, viðskiptavinum eða öðrum hagsmunaaðilum nema um sé að ræða jóla- eða áramótagjafir og verðmætið sé óverulegt.

Sigrún segir að einu tilkynningarnar sem mannauðssviði hafi borist hafi verið vegna sælgætisgjafa til starfsmanna sem það hafi svo deilt með vinnufélögum sínum. „Í einu tilviki var starfsmanni sendur leikhúsmiði sem var afþakkaður og endursendur,“ bætir hún við.

Svipaðar reglur eru jafnframt í gildi fyrir starfsmenn fríhafnarinnar í Leifsstöð, en þó ekki jafn afdráttarlausar og hjá ÁTVR. Þar segir:

Óheimilt er að þiggja gjafir frá birgjum eða öðrum ef almennt má líta á það sem endurgjald fyrir greiða eða sérstaka þjónustu.