Útflutningsverðmætin aukast enn

Útflutningstekjur af vöru- og þjónustuviðskiptum voru rúmir 356 milljarðar króna á þriðja fjórðungi þessa árs. Er það um 44% aukning í krónum talið frá sama tímabili í fyrra. Gengi krónunnar var að jafnaði um 7% sterkara á þriðja fjórðungi í ár samanborið við sama tíma í fyrra. Aukningin á útflutningsverðmætunum er því meiri í erlendri mynt eða sem nemur 54 prósentum samkvæmt samantekt Radarsins, fréttablaðs Samtaka fyrirtækja í sjávarútvegi.

Þar segir að hlutdeild sjávar- og eldisafurða af útflutningsverðmætum minnki á milli ára þrátt fyrir sömu eða hærri tekjur á föstu verðlagi.

„Útflutningstekjur af sjávarafurðum voru um 65 milljarðar króna á þriðja ársfjórðungi og stóðu nánast í stað á milli ára á föstu gengi. Útflutningstekjur af eldisafurðum voru rúmir 8 milljarðar króna og jukust um 26% á milli ára á sama kvarða. Hlutur sjávar- og eldisafurða í útflutningstekjum þjóðarbúsins er þó töluvert lægri nú á þriðja ársfjórðungi en hann var á sama tímabili í fyrra, eða rúm 20% á móti tæpu 31%.“

Með öðrum orðum eru tekjur annarra útflutningsgreina að aukast eftir efnahagsáföllin sem fylgdu heimsfaraldri.