„Ekkert gerist nema í liðinu séu öflugir strákar og góður andi um borð. Stemningin þarf að vera létt eins og hér er raunin. Fín aflabrögð og að vel gangi er sameiginlegur árangur,“ segir Benedikt Páll Jónsson, skipstjóri á línubátnum Páli Jónssyni GK, í Morgunblaðinu í dag.

Titilinum deila saman þeir Benendikt og Jónas Ingi Sigurðsson; en báðir hafa þeir lengi verið á bátum Vísis hf. í Grindavík. Þetta eru útsjónarsamir og fisknir skipstjórar sem á síðasta ári veiddu alls 4.443 tonn í 43 róðrum, sem gerir 103 tonn í hverjum þeirra. Veiði á nýju ári fer ágætlega af stað og í vikunni var landað úr bátnum 82 tonnum, sem var þorskur því sem næst til helminga á móti öðrum tegundum.