Skipulagsfulltrúi Reykjavíkurborgar hefur samþykkt breytingu á nýtingu húsnæðisins við Skipholt 1. Í afgreiðslunni segir að sótt hafi verið um leyfi til þess að innrétta þar 38 íbúðir í stað hótels, að byggja svalir á götuhlið og svalagang á garðhlið. Sótt var um að byggja ofan á húsið, en fallið var frá þeirri ósk.
Vefurinn eirikurjonsson.is greinir frá.
Húsið við Skipholt 1 hefur svo sannarlega munað fífil sinn fegurri. Þar var áður til húsa Listaháskóli Íslands og Kvikmyndaskólinn en árið 2017 fékkst leyfi til þess að breyta því í 84 herbergja hótel fyrir 170 gesti.
Eigandi hússins er Kjartan Gunnarsson fjárfestir og fyrrum framkvæmdastjóri Sjálfstæðisflokksins. Kjartan hefur verið stórtækur í fjárfestingum undanfarin ár.
Hér að neðan má sjá mynd af húsinu eins og það er í dag og teikningar af húsinu frá Arkís, eins og það verður með nýsamþykktum breytingum.