Myndbandið var birt á Telegram að sögn CNN sem segir að í myndbandinu sjáist hópur kvenna, sem eru giftar rússneskum hermönnum eða mæður hermanna, standa þétt saman og halda á skilti.
„Mennirnir okkar eru sendir á vígvöllinn eins og lömb sem á að slátra. Fimm í einu á móti 100 þungvopnuðum hermönnum andstæðingsins,“ segir ein kona í myndbandinu.“
Eftir hvern ósigurinn á fætur öðru í Úkraínu greip Pútín til herkvaðningar í september þar sem 300.000 menn voru kvaddir í herinn, þar á meðal menn þessara kvenna.
Þegar mennirnir voru sendir á vígvöllinn höfðu þeir aðeins fengið nokkurra daga þjálfun.
Erlendir fjölmiðlar hafa áður skýrt frá því að hermennirnir hafi verið sendir á vígvöllinn illa búnir og nær matarlausir. Einnig hafa borist fréttir af slagsmálum og ölvun meðal herkvöddu mannanna.
Ekkert bendir til að herkvöddu mennirnir fái að snúa heim á næstunni því heimildir úr innsta hring Pútíns herma að hann sé reiðubúin til að standa í stríði árum saman til að ná markmiði sínu um að ná Kyiv á sitt vald. Hann er sagður hafa í hyggju að kalla 500.000 menn til viðbótar í herinn en því hefur hann neitað.