Spænsk stjórnvöld ætla að flytja 200 hælisleitendur í bráðabirgðabúðir sem herinn hefur sett upp til að bæta aðstæður á Kanaríeyjum.
Yfir sextán þúsund hælisleitendur hafa komið til Kanaríeyja á þessu ári, sem er tíu sinnum meira en á öllu síðasta ári.
Fyrir vikið hefur ringulreið ríkt við höfnina Arguineguin á stærstu eyjunni Gran Canaria.
Mannréttindahópar segja að um tvö þúsund manns hafi sofið á þessu svæði í marga daga og jafnvel vikur við erfiðar aðstæður. Hóparnir segja aðstæðurnar vera ómannúðlegar og hafa krafist aðgerða af hálfu stjórnvalda.
Í yfirlýsingu frá spænsku ríkisstjórninni kemur fram að bráðabirgðabúðirnar verða í Barranco Seco skammt frá höfuðborg eyjarinnar, Las Palmas, þar sem gömul vopn hafa verið geymd. Þar eru 23 tjöld sem geta hýst 200 manns, að sögn hersins.