Iðrast mistakanna sem leiddu til banaslyssins

Verkstjóri á byggingarsvæði í Taívan segist frá sér numinn af sorg vegna þeirra mistaka sem urðu á svæðinu er vöruflutningarbíll rann á lestarteina nærri borginni Hualien. Atvikið varð til þess að lest sem átti leið um fór út af sporinu og yfir 50 manns létust og 200 slösuðust.

Frétt af mbl.is

Tugir látnir í lestarslysi

Maðurinn, Lee Yi-hsiang, tilheyrði teymi sem ferðast reglulega um fjallahéruð landsins til að fylgjast með hættunni á aurskriðum sem gætu fallið á lestarteinana. Hann er talinn hafa verið undir stýri vörubílsins skömmu áður en hann rann á lestarvagnana.

Lee hefur verið yfirheyrður vegna málsins. Honum var fyrst sleppt úr haldi gegn tryggingafé, en á páskadag var hann úrskurðaður í varðhald á ný þar sem talin var hætta á að hann stryki. Í yfirlýsingu sem hann flutti fjölmiðlamönnum fyrir utan heimili sitt sagðist Lee hins vegar myndu vinna með rannsakendum slyssins og taka ábyrgð á því sem honum bæri.

Þriggja daga þjóðarsorg var lýst yfir í Taívan í kjölfar slyssins, sem er mannskæðasta lestarslys í landinu í áratugi. Um 500 farþegar voru um borð í lestinni sem var á leið frá höfuðborginni Taipei til Taitung.

Frétt af mbl.is

Lestarslysið vekur spurningar um öryggi

• Blogga um frétt