Þykir vænt um Leikni

Hilmar Árni Halldórsson sagði Stjörnuna hafa misst af tveimur stigum þegar liðið mætti Leikni í PepsíMax deildinni í knattspyrnu í kvöld en sagði margt ágætt við spilamennskuna. 

Liðin gerðu markalaust jafntefli í 1. umferð deildarinnar. 

Frétt af mbl.is

Rekinn af velli í frumrauninni með Stjörnunni

„Já ég held að það sé ekki hægt að orða þetta öðruvísi en að við höfum misst af tveimur stigum. Þetta eru svekkjandi úrslit. Það var margt ágætt í spilamennsku okkar og við þurfum að nýta færin betur og þá kemur þetta,“ sagði Hilmar Árni þegar mbl.is spjallaði við hann að leiknum loknum í kvöld. 

Hilmar Árni lék lengi með Leikni áður en hann fór til Stjörnunnar fyrir tímabilið 2016 og sló í gegn þegar Leiknir lék síðast í efstu deild árið 2015. Fylgja því tilfinningar fyrir hann að mæta Leikni?

„Já það er gerir það. Þetta er félag sem mér þykir vænt um og þekki marga í liðinu. En þegar út á völlinn er komið þá er þetta bara fótbolti.“

Eftir sérkennilegt undirbúningstímabil sem litaðist af samkomutakmörkunum getur verið erfitt fyrir liðin að finna taktinn í upphafi móts. Hvað telur Hilmar Árni að það geti tekið langan tíma? 

„Það er erfitt að segja. Kannski á maður ekki að pæla of mikið í því. Öll lið fengu sama undirbúning og við munum ekki fela okkur á bak við neinar svoleiðis afsakanir. Þegar út á völlinn er komið er okkar að standa okkur,“ sagði Hilmar ennfremur. 

• Blogga um frétt