Þorsteinn Víglundsson, forstjóri Hornsteins, segir að forsendur kjarasamninga séu brostnar.
Í aðsendri grein í Fréttablaðinu segir hann að atvinnulífið ráði ekki við umsamdar launahækkanir vegna kreppunnar sem hefur fylgt kórónuveirunni.
Hann segir að innistæðulausar launahækkanir núna muni eingöngu auka atvinnuleysi og verðbólgu. Einnig segir hann það áhyggjuefni að forysta verkalýðshreyfingarinnar virðist ætla að stinga höfðinu í sandinn.
„Þetta er ekki „grímulaus hræðsluáróður auðvaldsins“ líkt og gjarnan er haldið fram í tilfinningaþrunginni orðræðu nýrrar forystu ASÍ. Þetta eru einfaldar efnahagslegar staðreyndir. Staðreyndir sem viðurkenndar eru af verkalýðshreyfingu á öllum Norðurlöndunum nema hér. Staðreyndir sem við höfum ítrekað sannreynt hér á landi,“ segir Þorsteinn í greininni.
„Verði ekki brugðist við þessari þróun með endurskoðun samninga er ljóst að uppsagnir fyrirtækja verða meiri en þegar er raunin og hætt er við að verðbólga verði að sama skapi hærri en ella.“