Sajid Javid, sem tók nýlega við sem heil­brigð­is­ráð­herra í Bret­landi, baðst í dag afsök­unar á því að hafa sagt að kom­inn væri tími til þess að læra að lifa með veirunni, í stað þess að fólk „hnipraði sig sam­an“ gagn­vart henni.

Ýmsir tóku ummælin óstinnt upp og var heil­brigð­is­ráð­herr­ann sagður ófær um að átta sig á áhyggjum þeirra sem eru með und­ir­liggj­andi sjúk­dóma og sér­stak­lega við­kvæmir gagn­vart veirusmiti. Sömu­leiðis þótti aðstand­endum þeirra sem hafa lát­ist vegna veirunnar ráð­herr­ann ekki hafa valið góð orð.

Ráð­herr­ann setti ummæli sín fram á Twitter í gær, en hefur í dag beðist afsök­unar sem áður segir og eytt fyrri færslu sinni.

„Ég var að lýsa yfir þakk­læti fyrir það að bólu­efnin eru að hjálpa okkur að ná við­spyrnu sem sam­fé­lag, en þetta var lélegt orða­val og ég biðst ein­læg­lega afsök­un­ar,“ ­skrifar Javid á Twitter í dag.

Hann seg­ist jafn­framt, eins og margir aðrir Bret­ar, hafa misst nákomna vegna veirunnar og myndi aldrei gera lítið úr áhrifum henn­ar.

Sjálfur greind­ist heil­brigð­is­ráð­herr­ann með COVID-19 um miðjan mán­uð­inn og þurftu bæði Boris John­son for­sæt­is­ráð­herra og Rishi Sunak fjár­mála­ráð­herra að fara í sótt­kví eftir að hafa fundað með honum skömmu áður en smitið kom í ljós.

Öllum tak­mörk­unum vegna veirunnar á borð við fjölda­tak­mark­an­ir, hömlum á opn­un­ar­tíma skemmti­staða og grímu­skyldu var aflétt í Bret­landi þann 19. júlí.

Þá voru um 50 þús­und smit að grein­ast á hverjum degi, en síðan þá hefur fjöldi dag­legra smita farið undir 30 þús­und. Sér­fræð­ingar hafa þó áhyggjur af því að smit­kúr­van kunni að taka aðra sveiflu upp á næstu dög­um.