Íslendingar erlendis hafa lent í erfiðleikum undanfarið vegna þess að greiðslur að heiman hafa ekki borist í gegnum Arion banka. Þá hafa aðrir viðskiptavinir bankans lent í því að yfirdráttarheimildir virðast hafa verið felldar niður.

DV heyrði í Íslendingi erlendis sem átti von á greiðslu að heiman á mánudag en hún hefur ekki skilað sér ennþá þó að hún hafi verið innt af hendi.

DV hafði samband við Harald Guðna Eiðsson hjá upplýsingasviði bankans og kannaðist hann við málið. Um er að ræða tvö aðskilin tæknivandamál og er búið að leysa annað þeirra. Greiðslur ættu að vera farnar að berast óhindrað í dag en samkvæmt svarinu var málið leyst í gær:

„Í upphafi vikunnar varð rof á sambandi milli greiðslukerfa Arion banka og þeirrar erlendu fjármálastofnunar sem er mótaðili bankans þegar um er að ræða greiðslur í evrum á milli landa. Þetta hafði í för með sér að greiðslur skiluðu sér í einhverjum tilfellum seinna til viðtakenda. Búið er að koma í veg fyrir vandamálið og eðlilegt flæði á greiðslum komst á um miðjan dag í gær.

Yfirdráttarheimildir á reikningum hafa í mörgum tilvikum ekki verið sýnilegar í netbanka og appi í morgun þrátt fyrir að heimildirnar séu í gildi og hægt að ganga á þær. Þetta hefur því hvorki áhrif á raunverulega stöðu reikninga né greiðslur. Unnið er að greiningu og úrlausn.“