Kaupir Manchester City enska landsliðsfyrirliðann Harry Kane af Tottenham fyrir 160 milljónir punda og greiðir honum 400 þúsund pund í laun á viku?
Þetta er fullyrt í enska götublaðinu The Sun í dag en með þessu yrði Kane dýrasti og launahæsti knattspyrnumaður Englands frá upphafi. Þar er jafnframt sagt að Daniel Levy, stjórnarformaður Tottenham, hafi samþykkt að Kane geti yfirgefið félagið í sumar en hann hefur leikið með Lundúnaliðinu allan sinn feril.
Manchester City er líka sagt á höttunum á eftir Jack Grealish, enska landsliðsmanninum hjá Aston Villa, og gæti verið tilbúið til að selja Bernardo Silva til að fjármagna kaupin að hluta.