Þetta húsnæði er þannig uppsett hvað varðar grunnteikningar og grunnstrúktúr að það hentaði mjög vel undir þessa breytingu. Þetta er hagkvæm breyting sem gerir okkur kleift að bjóða íbúðirnar á þessu lága verði,“ segir Skúli Mogensen, fyrrverandi forstjóri WOW Air, í samtali við DV, en hann hefur nú komið í sölu 80 íbúðum á Ásbrú á Suðurnesjum. Íbúðirnar kosta frá 14,9 milljónum króna sem er afar hagstætt verð.
Greint er frá þessu á vef Víkurfrétta. Um er að ræða tvær blokkur með 40 íbúðum hvor. Byggingarnar hýstu áður Base Hótel en húsnæðinu var umbreytt í litlar íbúðiar. 72 af íbúðunum 80 eru tveggja herbergja. Fasteignasölurnar M2 í Reykjanesbæ og Stakfell í Reykjavík eru með íbúðirnar í sölu.
Skúli segir að íbúðirnar henti mjög vel sem fyrsta eign og þar með fyrir ungt fólk. Ekkert sé því til fyrirstöðu að fólk úr Reykjavík setjist að á Ásbrú. „Leiðin á milli Reykjavíkur og Suðurnesja er stutt og er alltaf að styttast,“ segir Skúli.
Líklegt má telja að íbúðirnar seljist upp fyrr en varir. Byrjunin lofar góðu: „Við vorum með foropnun um síðustu helgi og það seldust strax 11 íbúðir, sem er mjög jákvætt,“ segir Skúli.