Íslendingaliðin AGF og Horsens komust í kvöld í sextán liða úrslit dönsku bikarkeppninnar í knattspyrnu þar sem Jón Dagur Þorsteinsson skoraði fyrir AGF og Ágúst Eðvald Hlynsson lagði upp mark í óvæntum sigri Horsens.
AGF sótti heim hið gamalgróna félag Frem, sem nú leikur í D-deildinni, til suðurhluta Kaupmannahafnar og vann öruggan 3:0 sigur. Mörkin komu öll um miðjan fyrri hálfleik og Jón Dagur skoraði það fyrsta. Hann lék fyrstu 65 mínúturnar með Árósaliðinu.
Horsens, sem leikur í B-deildinni, vann hinsvegar óvæntan sigur, 3:2, á úrvalsdeildarliðinu Silkeborg sem Stefán Teitur Þórðarson leikur með.
Eftir að hafa lent snemma undir skoraði Horsens þrjú mörk með stuttu millibili í fyrri hálfleik og Ágúst Eðvald lagði upp eitt þeirra. Hann lék allan leikinn með Horsens og Aron Sigurðarson síðustu 20 mínúturnar. Stefán Teitur lék seinni hálfleikinn með Silkeborg.