Önnur umferð úrvalsdeildar karla í körfuknattleik, Dominos-deildarinnar, verður leikin í kvöld og annað kvöld. Nú eru einmitt eitt hundrað dagar frá því fyrstu umferðinni lauk en eftir að Keflvíkingar höfðu sigrað Þór á Akureyri, 94:74, þann 6. október var öllu skellt í lás og Íslandsmótinu frestað vegna útbreiðslu kórónuveirunnar.
Í þessari fyrstu umferð í byrjun október vann Grindavík sigur á Hetti á Egilsstöðum, 101:94, ÍR lagði Tindastól á Sauðárkróki, 87:83, Þór vann Hauka í Þorlákshöfn, 105:97, Njarðvík vann KR í Vesturbænum, 92:80, og Stjarnan lagði Val á Hlíðarenda, 91:86.
Fjórir leikir af sex í umferðinni fara fram í kvöld og þar er sérstaklega áhugaverð viðureign KR og Tindastóls á dagskránni. Bæði liðin töpuðu á heimavelli í fyrstu umferð. KR-ingar mæta með nýjan leikmann, Ty Sabin, en tveir eru farnir sem spiluðu gegn Njarðvík í haust.
Njarðvíkingar taka á móti Haukum og eru með talsvert breytt lið frá sigrinum á KR í haust. Zvonko Buljan, sem þá átti stórleik, er farinn aftur, sem og Ryan Montgomery, en þeir hafa fengið mikinn liðsauka í Antonio Hester, fyrrverandi leikmanni Tindastóls. Haukar eru með þrjá nýja menn sem þeir frumsýna væntanlega í kvöld.