Chelsea skoraði fjögur í Rússlandi

Chelsea vann sinn fyrsta sigur í Meistaradeild Evrópu á leiktíðinni er liðið heimsótti Krasnodar til Rússlands í kvöld og vann 4:0. Var staðan 1:0 þar til korter var eftir en Chelsea gekk á lagið á lokakaflanum. 

Enska liðið fékk gott tækifæri til að skora fyrsta markið á 14. mínútu en Jorginho nýtti ekki vítaspyrnu. Englendingurinn ungi Callum Hudson-Odoi sá hinsvegar um að gera fyrsta mark leiksins á 37. mínútu og var staðan í hálfleik 1:0. 

Chelsea fékk aðra vítaspyrnu á 76. mínútu og Timo Werner fór á punktinn og skoraði af öryggi. Werner kom til Chelsea í sumar, eins og Hakim Ziyech, og var það Ziyech sem skoraði þriðja markið aðeins þremur mínútum síðar. Bandaríkjamaðurinn Christian Pulisic gulltryggði 4:0-sigur Chelsea á 90. mínútu með fjórða og síðasta marki leiksins. 

Chelsea er í toppsæti E-riðils með fjögur stig, en Krasnodar er með eitt stig eftir tvo leiki. 

Í H-riðli gerði Paris SG góða ferð til Tyrklands og vann Basaksehir 2:0. Moise Kean, lánsmaður frá Everton, skoraði bæði mörk PSG í seinni hálfleik. PSG er með þrjú stig eftir tvo leiki en tyrkneska liðið er án stiga. 

Moise Keane skoraði bæði mörk PSG. AFP

• Blogga um frétt