Viggó Kristjánsson var markahæstur í liði Stuttgart þegar liðið laut í lægra haldi, 25:27, á heimavelli gegn Erlangen í þýsku 1. deildinni í handknattleik karla í kvöld.
Viggó fór fyrir sínum mönnum og skoraði sjö mörk ásamt því að gefa tvær stoðsendingar og blokka eitt skot í vörninni.
Það dugði þó ekki til þar sem Erlangen tryggði endanlega sæti sitt í þýsku 1. deildinni á meðan Stuttgart getur enn þá fallið niður í B-deildina.
Stuttgart er í 14. sæti, fimm stigum fyrir ofan Ludwigshafen í 17. og síðasta fallsætinu, en lið Viggós er búið að spila einum leik meira. Erlangen er eftir sigurinn í kvöld þremur stigum á undan Stuttgart í 13. sæti.
Fleiri leikir voru á dagskrá í þýsku 1. deildinni í kvöld.
Füchse Berlín vann öruggan 36:30 sigur gegn Balingen, þar sem Oddur Gretarsson skoraði eitt mark fyrir síðarnefnda liðið.
Balingen er í 15. sæti, þremur stigum fyrir ofan Ludwigshafen en líkt og Stuttgart búið að spila einum leik meira. Liðið er þar með enn í hættu á að falla.