Arne Slot, knattspyrnustjóri Hollandsmeistara Feyenoord, hefur útilokað að hann taki við stjórnartaumunum hjá enska félaginu Tottenham Hotspur.
Undir stjórn Slot hefur Feyenoord aðeins tapað einum deildarleik á tímabilinu og tryggði sér hollenska meistaratitilinn með sigri á Willum Þór Willumssyni og félögum í Go Ahead Eagles þann 14. maí síðastliðinn.
„Mér hafa borist til eyrna fjöldi orðróma um áhuga á mér annars staðar frá. Þó ég sé vissulega þakklátur fyrir það er það ósk mín að vera áfram hjá Feyenoord og halda áfram að vinna við það sem við skópum á undanförnu ári.
Við höfum ekkert rætt kaup og fundurinn [með stjórn Feyenoord] í gær sneri einungis að viðræðum um framlengingu á samningi mínum. Allar viðræður mínar við félagið hafa einungis snúið að því. Ég hlakka til næsta tímabils með Feyenoord,“ sagði Slot á blaðamannafundi í gær.
Sky Sports greinir frá því að Tottenham hafi ákveðið að hætta við að reyna við Slot vegna skorts á vilja til að greiða klásúlu í samningi hans við Feyenoord til þess að losa hann þaðan.
Þar segir einnig að Tottenham hafi ávallt haldið því fram að félagið hafi aldrei rætt beint við Slot.