Landsliðsmennirnir nýhættu Hannes Þór Halldórsson og Kári Árnason voru heiðraðir á Laugardalsvelli í kvöld fyrir leik Íslands og Liechtenstein í undankeppni HM í fótbolta. Hannes og Kári fengu blómvendi frá Vöndu Sigurgeirsdóttur, nýkjörnum formanni KSÍ, fyrir leik.
Báðir leikmenn hafa lagt landsliðsskóna á hilluna en Hannes, sem er 37 ára gamall, lék sinn fyrsta landsleik gegn Kýpur árið 2011 í undankeppni EM 2012. Hann lék 77 A-landsleiki og var aðalmarkvörður liðsins á EM 2016 í Frakklandi og HM 2018 í Rússlandi.
Kári, sem er 38 ára gamall, lék sinn fyrsta A-landsleik árið 2005 þegar Ísland mætti Ítalíu í vináttulandsleik ytra. Hann lék 90 A-landsleiki þar sem hann skoraði sex mörk en hann hefur verið lykilmaður í liðinu undanfarinn áratatug.