Þurft að toga stundum aðra leiðina vegna veðurs

„Þetta er vont veður og gengur á með hríðum. Við erum í vesturjaðrinum á þessu veðri og þyrftum að fara yfir hinumegin til að komast í skaplegt veður,“ segir Jóhannes Ellert Eiríksson, skipstjóri á Viðey RE-50, í samtali við blaðamann.

Veðurspáin er sérlega slæm á norðvestanverðu landinu í dag og er spáð töluverðu hvassviðri. Verst á staðan að vera milli 12 og 18.

Frétt af mbl.is

Verður einna verst á milli 12 og 18 í dag

Það var kominn suðvestan stormur á Vestfjarðarmiðum og ölduhæðin um sex til átta metrar um klukkan eitt þegar rætt var við Jóhannes Ellert. Skipið hefur verið á veiðum á Víkurálnum.

„Þetta er enginn svakalegur sjór, það fer ekkert illa um okkur. Það gerist nú reyndar aldrei á Viðey að það fari illa um okkur. Þau láta vel í sjó þessi skip,“ segir hann.

Sjólagsspá Vegagerðarinnar eins og hún lítur út fyrir klukkan 18 í kvöld. Kort/Vegagerðin

Ekki er langt síðan Viðey mætti á miðin, en hvernig hafa veiðar gengið til þessa? „Við köstuðum klukkan ellefu í gærkvöldi og þetta er allt í lagi miðað við aðstæður – miðað við hvað veðrið er vont. Þetta sleppur til. Við höfum stundum þurft að toga bara aðra leiðina í hríðunum. […] Það er aðeins fast núna og það er ekki gott að hífa úr festi í svona slæmu veðri,“ svarar skipstjórinn.

Hann segir að gert sé ráð fyrir að Viðey komi til hafnar annað hvort á Grundarfirði á Sunnudagskvöld eða í Reykjavík á mánudag.

Viðey RE við bryggju í Reykjavík. mbl.is/Árni Sæberg

• Blogga um frétt