Urðu sjóveik á leiðinni í Íslandsmeistarapartí

Þórey Anna Ásgeirsdóttir var í lykilhlutverki hjá Val þegar liðið tryggði sér Íslandsmeistaratitilinn í handknattleik kvenna á dögunum.

Frétt af mbl.is

Valur Íslandsmeistari eftir spennuleik í Eyjum

Valur vann afar sannfærandi sigur gegn ÍBV í úrslitaeinvígi Íslandsmótsins, 3:0, en Valskonur unnu fyrsta leikinn 30:23 í Vestmannaeyjum, annan leikinn 25:22 á Hlíðarenda og loks þriðja leikinn í Vestmannaeyjum með tveggja marka mun, 25:23.

Eftir að Íslandsmeistarabikarinn fór á loft tók við þriggja tíma sigling heim með Herjólfi en siglt var til Þorlákshafnar um helgina.

„Við fögnuðum þessum titli auðvitað vel og innilega en Herjólfsferðin heim var svakaleg. Siglingin tók um þrjá tíma held ég og sjórinn var ógeðslegur svo ég segi það nú bara hreint út. Það var engin sumarfílingur yfir siglingunni og mér leið hálfpartinn eins og við værum að sigla að vetri til.

Það voru alveg einhverjir leikmenn og í starfsliðinu sem urðu sjóveikir og ég þurfti til að mynda að leggjast upp í koju svo ég yrði ekki fárveik hreinlega. Þetta var ágætis upplifun en það var gott að finna fast land undir fótum með bikarinn í höndunum.“

Viðtalið má sjá í heild sinni á íþróttasíðum Morgunblaðsins í dag.