Einn slasaður eftir vélsleðaslys

Lögreglan á Norðurlandi eystra fékk tilkynningu um vélsleðaslys á Tröllaskaga nálægt Lágheiði kl. 13:24 í dag. Þar væri um einn slasaðan mann að ræða. Viðbragðsaðilar á svæðinu voru ræstir út sem og þyrla Landhelgisgæslunnar. 

Lögreglan á Norðurlandi eystra segir að aðgerðarstjórn hafi verið virkjuð á Akureyri.

Um klukkustund síðar voru sjúkraflutninga- , björgunarsveitar- og lögreglumenn komnir á vettvang. Þyrla LHG kom skömmu síðar og var hinn slasaði hífður upp í hana og flaug hún með hann á Sjúkrahúsið á Akureyri. 

Hópur vélsleðamanna mun hafa verið þarna saman á ferð en ekki er vitað hvernig slysið bar að.     

Þegar mbl.is hafði samband við Slökkviliðið á Akureyri fengust þær upplýsingar að sá slasaði væri ekki lífshættulega slasaður. 

• 1 blogg um fréttina

Bloggað um fréttina

• Torfi Kristján Stefánsson: Lágheiði rétt við Siglufjörð?