Muggur - Guðmundur Thorsteinsson

Hvar? Listasafn Íslands

Hvenær? Stendur til 13. febrúar 2022

Á sýningunni „Muggur – Guðmundur Thorsteinsson“ kynnast gestir sérstæðum myndheimi Muggs þar sem meðal annars prinsar og prinsessur dvelja í fögrum höllum, þeir kynnast tröllaheimum myrkurs og ógnar, landslagi og sveitasælu á Íslandi, ferðaminningum frá framandi stöðum, náðarheimi trúarinnar þar sem Kristur læknar sjúka auk þess sem á sýningunni er að finna skoplegar og skondnar teikningar og þjóðsögur. 

„Muggur var einstakur listamaður og heillandi persónuleiki sem lést aðeins 32 ára að aldri. Hann hefur réttilega verið kallaður fyrsti fjöllistamaður Íslands. Á sýningunni er leitast við að gera stuttum en glæsilegum listferli hans ítarleg skil og sýna fjölbreytnina í áhrifamiklu höfundarverki hans sem spannar breitt svið bæði hvað efni og inntak varðar,“ segir Kristín G. Guðnadóttir sýningarstjóri.

Jazz í hádeginu: Ferðalag með Elvari Braga

Hvar og hvenær? Borgarbókasafnið Gerðubergi 14. janúar kl. 12.15 og Borgarbókasafnið Spönginni 15. janúar kl. 13.15

Hljómsveitina skipa þeir Elvar Bragi (flugelhorn og trompet), Hróðmar Sigurðsson (gítar) og Leifur Gunnarsson (kontrabassi). Lögin á efniskránni koma úr öllum áttum svo sem Kind folk (Kenny Wheeler), Sirrý (Elvar Bragi Kristjónsson), Gone fishing (Hróðmar Sigurðsson) og Skuggar í dimmum borgum (Leifur Gunnarsson).

„Tilvera okkar er undarlegt ferðalag“ skrifaði ljóðskáldið á sínum tíma. Ferðalög eru margslungin, þau geta verið bókstafleg, andleg og líkamleg. Á þessum tónleikum bjóðum við gestum upp á alls konar ferða„lög“,“ segir Elvar sem hefur verið virkur í tónlist síðan hann byrjaði í ballhljómsveit með pabba sínum aðeins 15 ára gamall. Hann útskrifaðist frá TFÍH með burtfararpróf í jazztrompetleik vorið 2016. Elvar er hljóðfæraleikari, lagahöfundur og útsetjari. Hann hefur spilað, útsett og samið tónlist með Unu Stef, Babies flokknum, Hróðmari Sigurðssyni, Stórsveit Reykjavíkur, Bangoura Band, Big Band Samma svo eitthvað sé nefnt.

Hjólatúr | Stefnumót við skáldin í hverfinu

Hvar? Borgarbókasafnið Kringlunni

Hvenær? Laugardaginn 15. janúar

Árni Davíðsson hjá Hjólafærni á Íslandi og Guttormur Þorsteinsson, sagnfræðingur og deildarbókavörður á Borgarbókasafninu, fara með áhugasama í hjólatúr á vegum Borgarbókasafnsins. Guttormur les upp ljóð og prósa sem tengjast hverfunum í kringum Kringlumýri, þátttakendur kynnast skáldunum í Hlíðunum og Háaleitishverfi og svo verður elst við ketti í Kringlunni og ræningja í Öskjuhlíðinni.

Hjólatúrinn hefst við Borgarbókasafnið Kringlunni og ættu þátttakendur að mæta í hlýjum fatnaði og með hjól sem henta veðri og færð. 

Boðið er upp á fleiri hjólatúra með bókmenntalegu ívafi til apríl, sjá heimasíðu Borgarbókasafnsins. Verkefnið er samstarfsverkefni Borgarbókasafnsins, Hjólafærni á Íslandi og Landssamtaka hjólreiðamanna og fékk það styrk frá Miðborgarsjóði Reykjavíkurborgar.

Ljósmyndahátíð Íslands: Loftþétt

Hvar: Ásmundarsalur

Hvenær: 15.–30. janúar

Laugardaginn 15. janúar opnar sýningin Loftþétt í Ásmundarsal. Að sýningunni standa Klængur Gunnarsson og Hrafn Hólmfríðarson Jónsson (Krummi). Í verkum sínum takast listamennirnir á við hversdagslega tilburði, fyrirbæri og staði. Sýningin veltir fyrir sér lágstemmdum möguleikum í hversdagsleikanum og hátíðlegum áformum um uppbrot hans.

Mynd: Ásmundarsalur

Barrokk – óperu – jazz | Tíbrá tónleikaröð

Hvar? Salurinn

Hvenær? 25. janúar

Verð 4.400 kr.

Á tónleikunum verða fluttar aríur, dúettar og forleikir úr barrokkóperum eftir meðal annars Händel, Glück og Purcell og munu klassískar söngkonur og jazztónlistarmenn tvinna saman tónlistarstefnur og -stíla. Listamennirnir eru Ingibjörg Guðjónsdóttir sópransöngkona, Nathalía Druzin Halldórsdóttir mezzósópransöngkona, Kjartan Valdemarsson píanóleikari, Magnús Tryggvi Elíasen gítarleikari og Óskar Guðjónsson saxófónleikari.

„Barrokk-óperu-jazz er dálítið sérstök samsetning en einstaklega spennandi og forvitnilegt hvernig þessar ólíku en þó líku tónlistarstefnur koma saman,“ segir Ingibjörg Guðjónsdóttir. Og Nathalía Druzin bætir við: „Það sem við leyfum okkur að gera er að taka þekktar aríur og dúetta sem okkur þykir vænt um og höfum flutt áður á hefðbundinn hátt og leyfum okkur að spinna þær og snúa þeim í svolítið nýjar áttir og víddir.“

Sóli Hólm - Loksins eftirhermur

Hvar? Bæjarbíó

Hvenær? 27.–29 janúar, 10.–12. febrúar og 24.–26. febrúar.

 Sýning Sóla Hólm, Loksins eftirhermur, var frumsýnd í haust og hafa um 5.000 gestir séð hana. Sóli heldur áfram að gleðja landann á nýju ári og er markmiðið að gera tilveru fólks örlítið jákvæðari.

„Þetta gekk fáránlega vel fyrir áramót og sem betur fer náði ég að klára að sýna allar sýningar fyrir jól. Nú get ég ekki beðið eftir að byrja aftur,“ segir Sóli. „Þetta er þriðja sýningin sem ég set upp og fólk sem hefur ekki hag af því að láta mér líða sem best hefur sagt mér að þetta sé mitt besta verk og ég hef ákveðið að trúa því. Þarna er ég bara að gera það sem ég geri best, sem er að herma eftir fólki og gera grín að málefnum líðandi stundar.“

Jóhannes S. Kjarval: Í íslenskum litum

Hvar: Kjarvalsstaðir

Hvenær: Opnuð 29. janúar.

Á sýningunni „Jóhannes S. Kjarval: Í íslenskum litum“ er lögð áhersla á litinn í verkum listamannsins og kannað hvernig litanotkun hans var háttað. Kjarval notaðist við fjölbreytta liti í listaverkum sínum en á síðu listasafsins segir að veður og birtuskilyrði hverju sinni hafi stýrt litavali landslagsverka og að í fantasíum og öðrum verkum hafi það verið tilfinning og persónuleg sýn listamannsins sem réði för. Á sýningunni á Kjarvalsstöðum hafa verið valin verk með það í huga að endurspegla frjálsa litanotkun og flæði hugmynda og tjáningar í list Kjarvals.

„Kjarval var mikill náttúruunnandi og málaði fjölda verka af litadýrð íslenskrar náttúru. Hann leit svo á að náttúra landsins væri litaspjald í sjálfri sér og vann þó nokkur verk af litaspjöldum samofnum náttúrunni,“ segir Edda Halldórsdóttir sýningarstjóri. „Á sýningunni verða nokkur litaspjöld til sýnis, þar á meðal tómt litaspjald sem var síðasta verkið sem hann vann áður en hann lést.“

Mynd: b'P\xc3\xa9tur Thomsen'