Karl Tómasson, fyrrverandi bæjarfulltrúi VG í Mosfellsbæ, segir ömurlegt að hlusta á suma frambjóðendur fyrir komandi bæjarstjórnarkosningar í Mosfellsbæ fara með hreinar og beinar lygar um störf hans í bæjarmálunum nú 16 árum síðar.
Karl fjallar um málið á facebook-síðu sinni og vitnar í Dagmál Morgunblaðsins, þar sem oddvitar sjö framboða í Mosfellsbæ fyrir komandi sveitarstjórnarkosningar tókust á.
Fjallað var um að þreyta væri komin í stjórnarsamstarf Vinstri-grænna og Sjálfstæðisflokksins sem á rætur að rekja til ársins 2006. Stöðnun sé farin að einkenna rekstur bæjarfélagsins og ákall sé eftir breytingum.
Anna Sigríður Guðnadóttir, oddviti Samfylkingarinnar í Mosfellsbæ, sagði að VG hefðu tekið ákvörðun árið 2006 um að fara í samstarf við Sjálfstæðisflokkinn. Karl segir það ósatt.
„Það er algerlega ljóst að við gengum ekki beint til samstarfs við Sjálfstæðismenn árið 2006, við gerðum allt sem í okkar valdi stóð til að mynda meirihluta með S og B lista. Það voru oddvitar þeirra lista sem börðust um að verða bæjarstjórar og komust ekki að samkomulagi um þannig að uppúr viðræðum slitnaði,“ skrifar hann á Facebook.
„Það er sérkennilegt að heyra nafn sitt dregið inn í kosningabaráttu 16 árum síðar, einhverja athygli hafa störf mín greinilega vakið.“