Katrín Jakobsdóttir forsætisráðherra kveðst ekki hafa kynnt sér ítarlega niðurstöðu Mannréttindadómstóls Evrópu en sýnist þó að um skýrari niðurstöðu sé að ræða en þá fyrri í Landsréttarmálinu.
Dómstóllinn komst fyrr í dag einróma að þeirri niðurstöðu að íslenska ríkið hefði brotið gegn sjöttu grein sáttmálans við meðferð máls Guðmundar Andra Ástráðssonar, sem ákærður var fyrir umferðarlagabrot fyrir Landsrétti.
„Þetta er samhljóma niðurstaða sem ekki var í fyrra tilfellinu,“ segir Katrín við blaðamann mbl.is eftir ríkisstjórnarfund.
Dómurinn kveði á um annmarka varðandi skipan fjögurra dómara en ekki allra alls dómsins. „Auðvitað er dómurinn gagnrýninn gagnvart fyrrverandi ráðherra en einnig Alþingi og Hæstarétti,“ segir forsætisráðherra.
Katrín bendir á að þrír af þessum fjórum dómurum hafa þegar gengið í gegnum nýtt tilnefningarferli til að öðlast sæti við réttinn. Niðurstaðan ætti að hennar mati því ekki að hafa áhrif á Landsrétt.
„Enn fremur vekur það athygli að ekki er gerð krafa um endurupptöku mála,“ segir Katrín og bendir á að endurupptökudómstóll, sem sé stofnsettur í dag, verði starfhæfur eftir áramót.