Íslenski boltinn

Náði góðum myndum af rauða spjaldi Guðmundar Andra

Óskar Ófeigur Jónsson skrifar
Hér má sjá góða mynd af atvikinu þegar Guðmundur Andri Tryggvason slær hendinni í andlit Kristijan Jajalo.
Hér má sjá góða mynd af atvikinu þegar Guðmundur Andri Tryggvason slær hendinni í andlit Kristijan Jajalo. Akureyri.net/Skapti

Valsmenn misstu mann af velli í stöðunni 1-0 á móti KA í Bestu deildinni í gær og enduðu á því að fara bara með eitt stig suður til Reykjavíkur.

Lykilatriði fyrir Valsmenn var því þegar þeir misstu mann af velli á 68. mínútu en þá hafði Tryggvi Hrafn Haraldsson komið Valsliðinu yfir fjórum mínútum fyrr. Hér í fréttinni má sjá bæði myndband af atvikinu sem og flottar myndir á akureyri.net.

KA-menn tóku völdin manni fleiri og tókst síðan að jafna metin á 82. mínútu með marki Nökkvi Þeys Þórissonar.

Það voru aftur á móti ekki skoruð fleiri mörk og liðin sættust því á 1-1 jafntefli.

Stærsta atvikið í leiknum var þetta rauða spjald sem Guðmundur Andri Tryggvason fékk fyrir að slá til Kristijan Jajalo, markvarðar KA. Erlendur Eiríksson var ekki í vafa og lyfti strax rauða spjaldinu.

Klippa: Rauða spjaldið hjá Guðmundi Tryggva

Jajalo var búinn að taka boltann og Guðmundur Andri átti aldrei möguleika í hann. Af einhverjum óskiljanlegum ástæðum ákvað hann hins vegar að slá til Jajalo. Það má sjá þetta atvik hér fyrir ofan.

Skapti Hallgrímsson hefur mætt á ófáa leikina í gegnum tíðina, bæði sem blaðamaður og ljósmyndari (og stundum bæði) og hann var vel á verði í gær þegar umrætt brot átti sér stað.

Skapti sem gefur út netmiðilinn akureyri.net við góðan orðstír náði góðum myndum af þessu atviki. Þar sést vel þegar Guðmundur Andri setur höndina í andlit Jajalo. Það má finna tvær af myndum hans hér í þessari frétt en einnig má finna myndasyrpuna hans með því að smella hér.

Erlendur Eiríksson var ekki í vafa og lyfti strax rauða spjaldinu eftir atvikið sem má sjá hér fyrir ofan.Akureyri.net/Skapti



Fleiri fréttir

Sjá meira


×