Margir telja hertar samkomutakmarkanir innanlands yfirvofandi í ljósi veldisvaxtar Covid-smita undanfarið þar sem yfirgnæfandi meirihluti smitaðra eru fullbólusettir.
Þórólfur Guðnason hefur ekki svarað þeirri spurningu í dag hvort hann leggi til hertar samkomutakmarkanir innanlands í næsta minnisblaði sínu til heilbrigðisráðherra.
Björn Ingi Hrafnsson, ritstjóri Viljans, sem svo ötullega hefur fjallað um faraldurinn allt frá því fyrsti Covid-upplýsingafundur Almannavarna var haldinn, telur engan vafa leika á um að blása þurfi af útihátíðir, ef marka má nýja Facebook-færslu hans:
„Miðað við smittíðnina undanfarið sem er í veldisvexti og tengist ekki síst næturlífinu, held ég að flestir geri sér grein fyrir því að óbreytt skemmtanahald á skipulögðum hátíðum um verslunarmannahelgina sé afar óskynsamlegt. Sóttvarnayfirvöld geta ekki annað en brugðist við þessari þróun ef ætlunin er að koma í veg fyrir að landið fari á rautt svæði. Þetta er alveg glatað, en kannski verður sumarið 2022 eitthvað betra. Vonum það.“
Upplýsingafundur Almannavarna verður kl. 11 í fyrramálið. Þórólfur Guðnason verður þar án vafa spurður út í næsta minnisblað sitt til heilbrigðisráðherra.