Evrópumeistarar Bayern München unnu nauman 2:1-sigur á Lokomotiv Moskvu í 2. umferð í riðlakeppni Meistaradeildar Evrópu í fótbolta í kvöld.
Leon Goretzka kom Bayern yfir á 13. mínútu og var staðan í hálfleik 1:0. Rússneska liðið gafst ekki upp því Anton Miranchuk jafnaði á 70. mínútu. Evrópumeistararnir áttu hins vegar lokaorðið því Josshua Kimmich skoraði sigurmarkið á 79. mínútu.
Bayern er í toppsæti A-riðils með sex stig, en Lokomotiv Moskva er með eitt stig.
Í B-riðli gerðu Shakhtar Donetsk frá Úkraínu og ítalska liðið Inter Mílanó markalaust jafntefli á heimavelli fyrrnefnda liðsins. Ítalska liðið var töluvert sterkari aðilinn í leiknum en Antolii Trubin í marki heimamanna átti stórleik.
Shakhtar er í toppsæti riðilsins með fjögur stig og Inter í öðru sæti með tvö stig.