Mikael Anderson, landsliðsmaður í knattspyrnu, lék allan leikinn með Midtjylland þegar danska liðið náði flottum úrslitum í Meistaradeild Evrópu á Ítalíu í kvöld.
Midtjylland gerði 1:1 jafntefli gegn Atalanta í D-riðli keppninnar og náði í sitt fyrsta stig í keppninni en ein umferð af sex er eftir í riðlakeppninni. Um tímamót var að ræða fyrir Mikael því hann hafði ekki áður byrjað inn á í keppninni en hafði komið inn á sem varamaður.
Alexander Scholz, fyrrverandi leikmaður Stjörnunnar, kom Midtjylland yfir á 13. mínútu en Cristian Romeru jafnaði fyrir Atalanta á 79. mínútu.
Ögmundur Kristinsson var ekki í leikmannahópi Olympiacos sem tapaði 2:1 fyrir Marseille í Frakklandi en er í harðri baráttu við franska liðið um þriðja sæti riðilsins og sæti í 32ja liða úrslitum Evrópudeildarinnar.