Afturelding hafði betur gegn Gróttu, 28:24, í fyrsta leik liðanna í úrslitum umspils um laust sæti í úrvalsdeild kvenna í handknattleik í Mosfellsbæ í kvöld.
Vinna þarf þrjá leiki til þess að tryggja sér sigur í umspilinu og sæti í úrvalsdeild á næsta tímabili.
Annar leikur liðanna fer fram á Seltjarnarnesi næstkomandi fimmtudag.
Mikið jafnræði var með liðunum til að byrja með og var staðan jöfn, 7:7, eftir 13 mínútna leik.
Þegar líða tók á fyrri hálfleik náði Afturelding undirtökunum og komst þremur mörkum yfir, 14:11. Grótta lagaði aðeins stöðuna í kjölfarið og voru heimakonur yfir, 16:14, í hálfleik.
Mosfellingar hófu síðari hálfleikinn af krafti og komust í 18:14. Þá tók Grótta einkar vel við sér og jafnaði metin í 20:20 þegar rúmar 42 mínútur voru liðnar af leiknum.
Þá var röðin aftur komin að Aftureldingu sem skoraði sex mörk gegn einu, komst þannig í 26:21 og fór langt með að tryggja sér sigurinn.
Staðan var svo orðin 28:22 þegar heimakonur slökuðu aðeins á klónni, Grótta skoraði síðustu tvö mörk leiksins og fjögurra marka sigur Aftureldingar niðurstaðan.
Saga Sif Gísladóttir átti stórleik í marki Aftureldingar er hún varði 15 skot.
Markahæst hjá Aftureldingu var Hrafnhildur Hólm Guðnadóttir með fimm mörk.
Hjá Gróttu var Katrín Anna Ásmundsdóttir markahæst, einnig með fimm mörk.