Kosningamálið í Norðvesturkjördæmi mun fara á borð Mannréttindadómstólsins. Þetta staðfestir Magnús Davíð Norðdahl í samtali við DV. Í yfirlýsingu sem hann sendi fjölmiðlum rétt í þessu segir Magnús að hann hafi tekið ákvörðunina að vandlega íhuguðu máli.
Magnús segir uppsprettu valds í lýðræðissamfélögum liggja í þingkosningum og að heilindi kerfisins alls séu þannig undir í þessu mikilvæga máli.
Magnús skrifar:
Ég lagði fram kæru þann til Alþingis þann 1. október síðastliðinn og krafðist ógildingar kosninganna í Norðvesturkjördæmi. Allar málsástæður kærunnar, hver um sig og eins allar saman, fólu í sér ógildingarannmarka sem voru til þess fallnir að draga úr trúverðugleika talningarinnar, sama hvort litið var til þeirrar fyrri eða síðari, lögbrota og starfa yfirkjörstjórnar í heild og þar með trúverðugleika kosninganna sem fram fóru í kjördæminu.
Magnús segir í yfirlýsingunni að fyrir hafi legið tvær talningar í „meingölluðu ferli þar sem hver ágallinn á fætur öðrum hefur komið í ljós.“ Mistekist hafi að túlka vilja kjósenda, þ.e. að telja atkvæðin með óvéfengjanlegum hætti.
„Hefðu vörslur kjörgagna verið með fullnægjandi mætti sannreyna hvor talningin hafi verið rétt en sá ómöguleiki er bein afleiðing af broti kjörstjórnar að hafa ekki farið að lögum varðandi varðveislu kjörgagna,“ skrifar Magnús og segir að þingmenn, frambjóðendur og kjósendur í landinu geti ekki vitað hvort núverandi samsetning þings sé rétt. „Slíkt þing getur aldrei talist lögmætt,“ segir hann svo.
Úr yfirlýsingu Magnúsar má jafnframt ráða að það eina sem komið getur skútunni á réttan kjöl sé að ógilda kosningarnar. „Þeir 42 þingmenn, sem lögðu blessun sína yfir kosningarnar í Norðvesturkjördæmi, þurfa að íhuga stöðu sína og framtíð í stjórnmálum fari svo að mál þetta vinnist fyrir Mannréttindadómstól Evrópu.“
Enginn ætti að taka lýðræðinu sem gefnum hlut, sérstaklega þegar kjörnum fulltrúum er falið að úrskurða um gildi kosninga þar sem þeir sjálfir náðu kjöri. Ég trúi því að réttlætið muni sigra í þessu máli þó síðar verði.