Handknattleiksmaðurinn Tumi Steinn Rúnarsson hefur gert tveggja ára samning við Val. Kemur hann til félagsins frá Aftureldingu, en Tumi er uppalinn hjá Val og lék þar áður en hann hélt í Mosfellsbæinn.
Hefur Tumi verið á meðal bestu leikmanna Aftureldingar síðustu tvö ár og lykilmaður hjá yngri landsliðum Íslands. Tumi skoraði 45 mörk í 19 leikjum með Aftureldingu á síðustu leiktíð og var í fjórða sæti yfir markahæstu menn.
Tímabilið á undan skoraði hann 75 mörk í 21 leik og var næstmarkahæstur á eftir Elvari Ásgeirssyni.
Afturelding hafnaði í þriðja sæti í deildinni á síðustu leiktíð, en ekki tókst að ljúka tímabilinu vegna kórónuveirunnar. Valsmenn voru krýndir deildarmeistarar, en liðið var með tveggja stiga forskot á toppnum þegar deildinni var aflýst.
Tumi Steinn heim í Val!