Arnar Gunnlaugsson, þjálfari Víkings Reykjavík, segist í samtali við mbl.is vera vongóður um að ná að semja við Arnór Borg Guðjohnsen, sóknarmann Fylkis.
Samningur hins 21 árs gamla Arnórs við Fylki rennur út í lok tímabils. Hann hefur komið við sögu í 11 leikjum liðsins í Pepsi Max-deildinni á þessari leiktíð.
Þá sagði Arnar í samtali við Fótbolta.net að Víkingur vonaðist einnig til að fá Kyle McLagan. Sá hefur verið lykilmaður í vörn Fram í Lengjudeildinni í ár. Framarar hafa rúllað deildinni upp og eru langefstir þegar ein umferð er óleikin.
„Vonandi náum við að semja við hann. Það eru einn til tveir aðrir sem eru líklegir til að semja við okkur von bráðar. Það eru sterkir póstar að hverfa á braut í haust og við þurfum að vera einu til tveimur skrefum á undan hinum liðunum sem eru líka byrjuð að vakna til lífsins og styrkja sig,“ sagði Arnar við Fótbolta.net. Sölvi Geir Ottesen og Kári Árnason munu leggja skóna á hilluna í lok leiktíðar og þarf því að styrkja vörnina.
Víkingar eru í bullandi toppbaráttu í Pepsi Max-deildinni. Liðið er í öðru sæti, 2 stigum á eftir Breiðabliki þegar tvær umferðir eru eftir.
Þá eru Víkingar komnir í undanúrslit Mjólkurbikarsins. Þar verður andstæðingurinn Vestri á útivelli.