Neyðarástandi hefur verið lýst yfir skammt frá borginni Tampa í Flórída í Bandaríkjunum eftir að stærðarinnar tjörn af eitruðu affallsvatni flæddi yfir bakka sína.
Rúmlega 300 heimili hafa verið rýmd vegna ástandsins en ríkisstjóri Flórída, Ron DeSantis, sagði í morgun að vatnið væri ekki geislavirkt heldur aðallega saltvatn sem læki frá affallsvatnsstöð í Piney Point, nærri Tampa. Forgangur hins opinbera væri að koma í veg fyrir heljarinnar umhverfistjón, sagði DeSantis við fjölmiðla vestra. BBC greinir frá.
Today I joined state officials in Manatee County who are actively responding to Piney Point and deploying all necessary resources. Please follow @FLSERT and @FLDEPNews for updates and monitor local alerts and evacuation orders. https://t.co/ACdrUdOkpO pic.twitter.com/ayOGoLR3Oo
— Ron DeSantis (@GovRonDeSantis) April 4, 2021
Affallsvatnið kemur frá gamalli áburðarverksmiðju og því inniheldur vatnið úr tjörninni fosfór og nitur. Tjörnin er um 31 hektari að stærð, eða á við 44 fótboltavelli.
Á föstudag reyndu viðbragðsaðilar að hækka bakka tjarnarinnar til að hindra framgöngu affallsvatnsins en þær tilraunir mistókust. Síðan þá hafa viðbragðsaðilar aðallega reynt að pumpa vatninu burt úr tjörninni eða reynt að ryðja vatninu leið í burtu frá byggð.
Með því að lýsa yfir neyðarástandi á svæðinu, eins og nú hefur verið gert, segir DeSantis að hægt sé að veita auknu fjármagni í björgunaraðgerðir.