Vilhjálmur Kári Haraldsson er hættur með kvennalið Breiðabliks en þetta staðfesti félagið seint í gærkvöldi. Hann mun því ekki stýra félaginu á næsta tímabili.
Vilhjálmur tók við Blikum í vetur þegar Þorsteinn Halldórsson tók við starfi landsliðsþjálfara og gefur hann ekki kost á sér í að halda áfram. Breiðablik náði ekki að vinna Íslandsmeistaratitilinn þetta árið en Vilhjálmur kom Breiðablik í úrslitaleik Mjólkurbikarsins og í riðlakeppni Meistaradeildar Evrópu. Það er stórt afrek enda í fyrsta skipti sem íslenskt félag kemst í riðlakeppnina.
Hér að neðan má sjá tilkynningu frá Knattspyrnudeild Breiðabliks um málið.
„Vilhjálmur Kári Haraldsson verður ekki þjálfari kvennaliðs Breiðabliks á næsta tímabili. Vilhjálmur tilkynnti stjórn að hann gæfi ekki kost á sér áfram eftir að samningur hans við Breiðablik rennur út. Vilhjálmur er í öðru starfi sem hann vill geta einbeitt sér að.“
„Vilhjálmur Kári tók við Blikum í vetur eftir að Þorsteinn Halldórsson var ráðinn landsliðsþjálfari. Vilhjálmur var þá nýlega búinn að tilkynna að hann væri hættur í þjálfun en sló til þegar honum bauðst starfið. Liðið tók miklum breytingum milli ára en Vilhjálmur og þjálfarateymið allt hefur unnið mjög gott starf.“
„Blikastelpur enda í 2.sæti í deildinni og hafa þar með tryggt sér þátttökurétt í Meistaradeild Evrópu á næsta keppnistímabili. Þá er liðið komið í úrslitaleik bikarsins og er fyrsta íslenska félagsliðið í sögunni til þess að komast í riðlakeppni Meistaradeildarinnar. Það eru því sannarlega fjölmörg spennandi verkefni framundan í haust og í vetur.“
„Stjórn knattspyrnudeildar vill þakka Vilhjálmi Kára fyrir gott samstarf á tímabilinu. Leit að nýjum þjálfara er þegar hafin,“ sagði að lokum í tilkynningu Breiðabliks.