Heimsmeistaramót kvenna í handknattleik hófst á Spáni í kvöld þegar gestgjafarnir tóku á móti Argentínu í Torrevieja.
Eftir jafnan fyrri hálfleik náði spænska liðið að hrista það argentínska af sér, valtaði hreinlega yfir það í þeim síðari, skoraði 18 mörk gegn þremur og vann stórsigur, 29:13. Carmen Campos og Alexandrina Cabral voru atkvæðamestar Spánverja með fimm mörk hvor.
Þetta er stærsta heimsmeistaramót kvenna frá upphafi en í fyrsta skipti leika 32 lið á HM og þeim er skipt í átta riðla. Með Spáni og Argentínu í H-riðli eru Austurríki og Kína.
Þórir Hergeirsson er með norska landsliðið í C-riðli ásamt Rúmeníu, Kasakstan og Íran og á fyrsta leik gegn Kasakstan á föstudagskvöld.