„Það var allt á fleygiferð“

Veðrið hefur ekki beint verið skemmtilegt að undanförnu, mikill vindur og dágóð ölduhæð, sem hefru ótvíræða ókostu fyrir þá sem stunda sjósókn. Fékk áhöfnin á Vestmannaey VE heldur betur að finna fyrir því þegar allt fór á ferð og kæliskápur opnaðist vegna álags.

„Þetta var alger brælutúr vægt til orða tekið. [...] Um tíma var veðrið alveg snarklikkað og ég sá vindmælirinn fara upp í 35 metra. Þegar mest gekk á var ástandið um borð afar erfitt en það var allt á fleygiferð. Meðal annars sprakk upp kæliskápur hjá kokkinum og allt fór út um allt. Það var heilmikil verkun á elhúsinu eftir ósköpin. Það er verulega notalegt að koma í land að loknum túr sem þessum,“ segir Egill Guðni Guðnason, skipstjóri á Vestmananey, í færslu á vef Síldarvinnslunnar.

Hann segir þó að það hafi fiskast vel og landaði togarinn fullfermi á mánudag. „Við hófum veiðar í Skeiðarárdýpi og á Öræfagrunni en veðrið var svo vitlaust að við fluttum okkur á Ingólfshöfðann. Þaðan var svo flúið í Meðallandsbugtina út af Skatárósum. Þar var heldur minni alda en vindurinn hins vegar jafn mikill og annars staðar,“ segir Egill Guðni.

Vestmannaey VE. Ljósmynd/Síldarvinnslan: Guðmundur Alfreðsson

Á stöðugum flótta

Vestmannaey var ekki eini togari samstæðunnar á miðunum í þesus ömurlega veðri og kom Gullver NS til hafnar á Seyðisfirði á laugardeg með 60 tonn eftir stuttan túr, mest þorsk og ýsu. Í færslunni er haft eftir Steinþór Hálfdanarson skipstjóra að veðrið hafi verið hundleiðinlegt allan túrinn. Ýsan fékkst í Litladýpi og þorskurinn í Reyðarfjarðardýpi og á Gerpisflaki.

Þá landaði Bergur VE fullfermi á mánudag, eins og Vestmannaey. „Það var vond bræla allan tímann. Veðrið var sérstaklega slæmt úti í kanti og því vorum við grunnt allan tímann. Segja má að við höfum verið á flótta undan veðri alla veiðiferðina. Við byrjuðum á Öræfagrunni í haugabrælu, fórum þaðan upp undir Ingólfshöfða í skárra veður en brátt gerði vitlaust veður þar og þá var haldið í Meðallandsbugtina og klárað þar í skítaveðri,“ segir Jón Valgeirsson skipstjóri á Bergi.

Gullver hélt á ný til veiða síðdegis á mánudag, en Bergur og Vestmannaey munu væntanlega láta úr höfn á morgun eða föstudag en það fer eftir veðri, að því er fram kemur á vef Síldarvinnslunnar.

Bergur VE. Ljósmynd/Egill Guðni Guðnason

• Blogga um frétt