Ráðstöfunartekjur hækkuðu en kaupmáttur dróst saman

Bráðabirgðaniðurstöður Hagstofu Íslands gefa til kynna að þrátt fyrir að ráðstöfunartekjur heimila hafi aukist um rúmlega níu prósent árið 2022 hafi kaupmáttur þeirra dregist saman um 1,7 prósent á mann á sama tíma.

Þetta kemur fram í nýrri samantekt Hagstofunnar.

Þá er reiknað með því að ráðstöfunartekjur hafi aukist um 9,1 prósent á fjórða ársfjórðungi 2022 sé litið til sama tímabils árið 2021. Ráðstöfunartekjurnar á mann hafi þá numið rúmlega 1,25 milljónum króna en sé tekið tillit til verðlagsþróunar hafi kaupmáttur ráðstöfunartekna dregist saman um tæp 3,4 prósent á ársfjórðungnum en á sama tíma hafi vísitala neysluverðs hækkað um 9,4 prósent.

Samantektin leiðir einnig í ljós að heildartekjur heimila hafi aukist um 9,9 prósent í fyrra og þá er einna helst átt við launatekjur en aukning launatekna nam um 260 milljörðum króna. Hvað varðar skýringu á aukningu launatekna eru launahækkanir og dvínandi atvinnuleysi sagðar vera aðal ástæðurnar.

Frekari upplýsingar má sjá á vef Hagstofu Íslands með því að smella hér.

• Blogga um frétt