Landsréttur staðfesti fyrir helgi úrskurð Héraðsdóms Reykjavíkur um að lögreglan á höfuðborgarsvæðinu mætti skoða innihald tveggja farsíma sem lagt var hald á í tengslum við rannsókn á fíkniefnalagabroti.
Forsaga málsins er sú að þann 13. ágúst síðastliðinn stöðvaði lögregla bifreið vegna gruns um akstur undir áhrifum fíkniefna. Þegar lögreglumaður varð var við sprautunál inni í bifreiðinni hófst leit að fíkniefnum í bílnum, þrátt fyrir orð ökumannsins um að hann væri hættur neyslu. Þegar lögreglumenn urðu þess áskynja að ökumaðurinn væri að reyna að fela bakpoka undir sæti bílsins óskuðu lögreglumennirnir eftir að fá að sjá innihald hans. Ökumaðurinn neitaði.
Á meðan á þessu stóð segir í úrskurðinum að ökumaðurinn hafi sífellt verið að fá smáskilaboð í farsímasinn sem hann setti svo í jakkavasann sinn. Ökumaðurinn var síðar handtekinn og við öryggisleit fundust fíkniefni í buxnavasa hans.
Í bakpokanum fundust þá talsvert magn ætlaðra ávana- og fíkniefna auk lyfseðilsskyldra læknalyfja, svokallaðs læknadóps. Einnig fann lögregla á sama stað töluverða fjármuni í reiðufé.
Lögreglan krafðist þess fyrir héraðsdómi að fá að rannsaka innihald farsímanna tveggja, sem einnig fundust við áðurnefnda leit, og fékk til þess heimild Héraðsdóms, meðal annars á þeim grundvelli að rökstuddur grunur væri fyrir því að ökumaðurinn hafi gerst sekur um alvarlegt brot gegn hegningar- og ávana- og fíkniefnalögum.
Sem fyrr sagði staðfesti Landsréttur þann úrskurð.