Fótbolti

Tíu Madrídingar snéru leiknum við í framlengingu

Hjörtur Leó Guðjónsson skrifar
Eden Hazard reyndist hetja Madrídinga í kvöld.
Eden Hazard reyndist hetja Madrídinga í kvöld. Getty/Manu Reino

Real Madrid vann 2-1 endurkomusigur í framlengdum leik er liðið heimsótti Elche í 16-liða úrslitum spænsku bikarkeppninnar Copa del Rey í kvöld, þrátt fyrir að vera manni færri stóran hluta framlengingarinnar.

Madrídingar voru meira með boltann í kvöld, en illa gekk að brjóta ísinn. Bæði lið fengu nokkur hálffæri, en ekki gekk að skora í fyrri hálfleik.

Sömu sögu er að segja af síðari hálfleik og enn var markalaust að venjulegum leiktíma loknum. Því þurfti að grípa til framlengingar til að skera úr um sigurvegara.

Það var ekki fyrr en á 102. mínútu sem dró loksins til tíðinda. Þá fékk Marcelo, varnarmaður Real Madrid, beint rautt spjald fyrir brot sem aftasti maður. Gonzalo Verdu tók aukaspyrnuna fyrir Elche en hún fór í varnarvegginn. Bolltinn barst þó aftur fyrir lappir Verdu og í þetta sinn gerði hann engin mistök og skoraði fallegt mark.

Madrídingum tókst þó að jafna leikinn þrátt fyrir að vera manni færri. Á 108. mínútu átti Daniel Ceballos skot að marki og boltinn fór af samherja hans, Isco, og þaðan í netið.

Það var svo Eden Hazard sem reyndist hetja Madrídinga þegar hann spændi upp vörn heimamanna og kláraði vel framhjá Axel Werner þegar um fimm mínútur voru til leiksloka.

Lokatölur urðu 2-1 og Real Madrid er því komið í áttaliða úrslit Copa del Rey, en dregið verður á morgun.




Fleiri fréttir

Sjá meira


×