Alls greindist 81 með COVID-19 í gær. Þetta kom fram á upplýsingafundi dagsins. Þórólfur Guðnason sóttvarnalæknir segir að þetta sé ekki upp á við og ekki mikið niður á við. Það ánægjulega var að 80% greindra voru í sóttkví. Fleiri sýni voru tekin í gær en undanfarna daga eða 2.700.
Um 3.000 eru núna í sóttkví. Kom einnig fram í tali Þórólfs að við erum enn að glíma við sama stofn af veirunni og undanfarna mánuði. Enginn nýr stofn hefur komið í ljós.
Alls 18 greindust á landamærum í gær og er það óvenjulega há tala. Segir Þórólfur þetta vera vísbendingu um að faraldurinn sé í vexti erlendis.
Þórólfur telur faraldurinn vera óbreyttan hér innanlands. Telur hann að faraldurinn muni ganga hægar niður núna en síðasta vetur.
Þórólfur skilar í dag minnisblaði til heilbrigðisráðherra um áframhald aðgerða eftir 19. október. Vildi hann ekki upplýsa um innihald minnisblaðsins en hann telur ekki mikið rúm fyrir tilslakanir þar sem faraldurinn er ekki farinn að minnka.