Berglind Björg Þorvaldsdóttir skoraði eina mark Le Havre er liðið steinlá gegn meistaraliði Lyon, 5-1, í efstu deild Frakklands í dag. Þá fór Sveindís Jane Jónsdóttir illa meidd af velli í sigri Kristianstad gegn Vaxjö í Svíþjóð.
Le Havre, sem er langneðst í deildinni, átti lítinn möguleika gegn Lyon. Með marki sínu minnkaði Berglind muninn í 2-1 en meistararnir áttu eftir að svara með þremur mörkum til viðbótar.
Anna Björk Kristjánsdóttir lék allan leikinn fyrir Le Havre í vörninni ásamt Andreu Hauksdóttur, sem spilar á miðjunni. Sara Björk Gunnarsdóttir, leikmaður Lyon, var ekki með í kvöld. Hún á von á barni og verður á Íslandi næstu mánuði.
Það var Íslendingaslagur í Svíþjóð þegar Vaxjö tók á móti Kristianstad. Lokatölur urðu 0-1 fyrir gestina.
Sveindís Jane var borin af velli illa meidd í lok fyrri hálfleiks. Hún virtist sárþjáð. Ekki er komið í ljós hversu alvarleg meiðslin eru að svo stöddu. Sif Atladóttir kom inn á fyrir Kristianstad þegar rúmar 10 mínútur lifðu leiks. Andrea Mist Pálsdóttir sat allan tímann á varamannabekk Vaxjö.