Valsmenn unnu afar sannfærandi 3:0 sigur á HK í Kórnum í kvöld og styrktu þar með stöðu sína á toppi úrvalsdeildar karla í fótbolta.
Patrick Pedersen skoraði fyrsta mark leiksins á 44. mínútu þegar hann fékk nægan tíma til að athafna sig í teig HK-inga, þakkaði fyrir það og renndi honum snyrtilega í netið.
Birkir Már Sævarsson skoraði annað mark leiksins í byrjun seinni hálfleik en þá fékk hann sendingu inn í teig frá Birki Heimissyni tók boltann viðstöðulaust og smellti honum í fjær hornið.
Það var svo Andri Adolfsson sem setti síðasta naglann í líkkistu HK-inga á 66. mínútu þegar hann skoraði ansi huggulegt mark, sláin inn.
Sigur Valsmanna þýðir það að þeir sitja enn í efsta sæti deildarinnar. HK-ingar eru sem fyrr í 11. sæti deildarinnar með einungis 10 stig.
Þetta var leikur tveggja hálfleika en það er með hreinum ólíkindum að staðan hafi verið 1:0 fyrir Val þegar Helgi Mikael dómari leiksins flautaði til hálfleiks. HK-ingar fengu urmul af færum i fyrri hálfleik og voru mun betri aðilinn.
Þeirra hættulegasta sókn var um miðjan fyrri hálfleikinn en þá bjó Birnir sér til gott færi sem endaði með skoti í innanverða stöngina. Það var ótrúlegt að HK hafi ekki náð að nýta eitt af þeim sem þeir færu en Hannes í marki Valsmanna var hreint út sagt frábær á þessum kafla og hreinlega neitaði að fá á sig mark.
Valsmenn náðu svo eins og fyrr segir að skora úr eina færinu sínu í fyrri hálfleik á 44. mínútu.
Í seinni hálfleik var sagan hinsvegar önnur en þar voru Valsmenn mun sterkari aðilinn en Birkir Már setti tóninn í upphafi seinni hálfleiks þegar hann skoraði líklega fallegasta mark sitt á ferlinum.
Í seinni hálfleik sást munurinn á liðunum en Valur er að berjast á toppi deildarinnar á meðan HK-ingar eru að reyna bjarga sér frá falli.
Fyrir þennan leik í Kórnum voru Valsmenn búnir að tapa fjórum leikjum í röð en slíkt hefur líklega ekki gerst lengi hjá Valsmönnum, þetta var því afar mikilvægur sigur fyrir þá en liðin sem eru fyrir neðan þau í töflunni eru ekki langt undan.
Það er hinsvegar alvöru fallbarátta framundan hjá HK-ingum en þeir sitja eins og fyrr segir í 11 sæti með 10 stig, þremur stigum frá öruggu sæti. Spilamennska HK-liðsins í fyrri hálfleik gefur samt sem áður góð fyrirheit ef þeir halda því áfram en þeir þurfa svo sannarlega á því að halda að skila slíkri frammistöðu í heilan leik og fá stig á töfluna því ef það fer ekki að breytast verður að telja ansi líklegt að það verði leikið í Lengjudeildinni í Kórnum á næsta tímabili.