Leik Aston Villa og Newcastle sem fara átti fram í ensku úrvalsdeildinni í knattspyrnu á Villa Park í Birmingham í kvöld hefur verið frestað.
Allur leikmannahópur Newcastle var sendur í sóttkví á þriðjudaginn eftir að kórónuveirusmit greindist innan hópsins.
Fimm leikmenn liðsins hafa greinst með kórónuveiruna á stuttum tíma og var æfingasvæði félagsins lokað í vikunni.
Til stóð að það yrði opnað á nýjan leik í gær en af því varð ekki og er allur leikmannahópur liðsins enn í sóttkví.
Ný dagsetning fyrir leikinn hefur ekki verið ákveðin en bæði lið hafa byrjað tímabilið ágætlega. Aston Villa er með 15 stig í tíunda sætinu og Newcastle er með 14 stig í því þrettánda.